Joko ona gure kantxara itzultzean.

Azkeneko asteetan Divinon burututako lanengatik han jokatu ezin eta gero, pasadan larunbatean Divinon jokatzera bueltatu ginen. Itzulera nahiko ondo etorri zitzaigun, partidako 48 minutuetan ikusitakoaren arabera.

Erasoan, baloia abiadurarekin atera genuen. Horri esker, trantsizioan eta espazioekin 1x1 onak jokatzeko aukera izan genuen. Korrika egin ezin genituen erasoetan, eta estatikoan jokatu genuenean, baloirik gabeko mugimendu onak egon ziren, eta espazioak ere aurreko partidetan baino hobeto errespetatu genituen.

Kantxaren bestaldean, defentsan, baloiarekin eta baloirik gabe, bizia eta aktiboa izan zen 1x1ko defentsa, eta horrek oso zaila egin zuen arerioaren erasoa. Bestalde, erreboteak hobetu behar ditugu, ez hainbeste harrapatzeko "nahia", baizik eta "nola" harrapatu nahi dugun.