Goiko ligan egoteko irabazi beharreko partidua. Gure neskak, partidu honen garrantzia jakinda, intentsitate handiarekin eta defentsa gogorrarekin sartu ziren partidura. Aurkariek ezin zuten jaurtiketa errazak egin eta erasoan zailtasunak zituzten baloia mugitzeko. Jarrera honi esker eta pasez gauzatutako kontraerasoei esker, markagailuan aurretik egotea lortu genuen hasieratik. Gainera, trantsizioan eta eraso estatikoan, aukera onenak bilatzen genituen beti.

Bigarren laurdenean, partiduaren erritmoa gurea izaten jarraitu zen, baina Araskiko jokalarien intentsitate handiari esker, bigarren aukerak lortzen zituzten erasoko erreboteak hartuta. Beraz, ezin izan genuen markagailuan diferentzia handitu atsedenaldia heldu zenean.

Bigarren zatia, beste partiduetan ez bezala, intentsitatea mantentzea lortu genuen, eta gure minuturik onenak etorri ziren. Hala ere, ezin ditugu hainbeste errebote galdu gure saskian.

Azkeneko minutuetan, erasoan arin mugitzen genuen baloia eta saskiratze errazak lortu genituen. Horrela, partidu bukaeran +21ko aldea lortu genuen, basket averagea ere irabaziz. Markagailuan 53-32.

Eskertu Divinora animatzera etorri zen jendeari. Datorren asteko partiduan itxaroten zaituztegu, San Viator C liderraren kontra, larunbat goizean (ordua oraindik finkatu gabe), Divinon.

Atzo, gaur ta beti, ¡ARABA!